Wednesday, 24 August 2016

Hospitali ya Wilaya ya Siha yapata dawa


Na. Immaculate Makilika
Hospitali ya Wilaya ya Siha iliyopo mkoani Kilimanjaro imetatua tatizo kubwa la upatikanaji wa dawa lililokuwa linaikabili hospitali hiyo na kusababisha wagonjwa kuhangaika kutafuta huduma hiyo katika maduka mbalimbali ya watu binafsi, huku dawa hizo zikiuzwa kwa bei kubwa tofauti na ya hospitali hapo.
Akizungumza hivi karibuni  kwa njia ya simu Mganga Mkuu wa hospitali hiyo Bw. Andew Method, alisema ni kweli hospitali hiyo ilikua na uhaba mkubwa wa dawa hali iliyosababisha usumbufu mkubwa kwa wagonjwa lakini zimefanyika jitihada kadhaa na kwa sasa hospitali hiyo imetatua tatizo hilo kwa asilimia 70.
“Tayari tulishaagiza dawa, na nyingi tulizokosa Bohari Kuu ya Dawa, tuliziagiza kutoka kwa wazabuni na tunatarajia kuzipata kabla ya mwisho wa wiki hii kwa ajili ya matumizi ya wagonjwa wanaokuja kutibiwa katika hospitali yetu na tunaamini zitasaidia kupunguza tatizo kwa asilimia 70 alisema, Bw. Method
Aliongeza kuwa, waliagiza dawa za aina mbalimbali ikiwemo za “antibiotics” na za kutuliza maumivu pamoja na vifaa tiba ambapo vyote kwa pamoja vimegharimu fedha  kiasi  cha shilingi milioni 10.
Aidha, Bw. Method alisema kuwa hospitali hiyo imeandaa mikakati kadhaa ili  kuhakikisha tatizo hilo linapatiwa ufumbuzi wa kudumu, ambapo  tayari wanajindaa na taratibu za kufanya  manunuzi ya dawa kutoka katika Bohari Kuu ya Dawa ikiwa ni pamoja na jitihada mbalimbali zinazofanywa kwa kushirikiana na  Mkuu wa Wilaya hiyo.

Rais Magufuli Ateua Mkurugenzi Mkuu Wa Idara Ya Usalama Wa Taifa



Rais Magufuli mgeni Rasmi Mkutano wa 32 wa ALAT


Mkuu wa Kitengo cha Biashara za Serikalini Bi. Domina Feruzi kulia akimkabidhi mfano wa hundi ya shilingi milioni 206 Makamu Mwenyekiti wa ALAT  Bw. Stephen Mhapa kushoto  kwa ajili ya mkutano wa 32 wa jumuiya hiyo wakati wa mkutano na waandishi wa habari uliofanyika jijini Dar es salaam

Makamu Mwenyekiti wa ALAT  Bw. Stephen Mhapa kushoto akiongea na waandishi wa habari hawapo pichani kuhusu mkutano wa 32 wa ALAT utakaonza mwishoni mwa Septemba mwaka huu , kulia ni Mkuu wa Kitengo cha Biashara za Serikalini Bi. Domina Feruzi.

Habari/Picha Na Ally Daud.

Rais wa Awamu ya Tano wa Jamhuri ya Muungano wa Tanzania Dkt. John Pombe Magufuli anatarajiwa kuwa mgeni rasmi katika mkutano mkuu wa 32 wa Jumuiya ya Tawala za Mitaa Nchini (ALAT) ambao utafanyika mwishoni mwa mwezi ujao mkoani Musoma.


Akizungumza na waandishi wa habari leo jijini Dar es salaam Makamu Mwenyekiti wa ALAT Bw. Stephen Mhapa amesema kuwa, katika mkutano huo wanatarajia Rais Magufuli kuwa mgeni rasmi ili kufikia malengo ya mkutano huo.

“Tumeamua kumuomba Mheshimiwa Rais kuwa mgeni rasmi kwa ajili ya kupata matunda mema ya mkutano huo kutokana na kauli mbiu yake ya Hapa Kazi Tu ili kuendana na kasi hiyo katika kuleta mendeleo na uongozi bora nchini,” alisema Bw. Mhapa.

Aidha Bw. Mhapa amesema kuwa uzinduzi wa mkutano huo utaendana na ukabidhishaji wa zawadi kwa mshindi wa shindano la Halmashauri bora kwa mwaka 2016  ambapo mshindi atayechaguliwa na wananchi kwa wingi atakabidhiwa Trekta yenye thamani ya shilingi milioni 56 ili kuinua shughuli za kimaendeleo.

Mbali na hayo Bw. Mhapa ameongeza kuwa mkutano huo utadhaminiwa na Benki ya NMB kwa kupokea kiasi cha shilingi milioni 206 ambazo milioni 56 zitatumika kugharamia zawadi na milioni 150 kugharamia mkutano huo.

Kwa upande wa Mkuu wa Kitengo cha Biashara za Serikalini kutoka benki ya NMB Bi. Domina Feruzi amesema kuwa wameamua kufadhili mkutano huo ili kurahisisha shughuli za kimaendeleo na kupata uongozi bora kwa faida ya watanzania.

“Tumeamua kudhamini mkutano huo ili kuweza kurahisisha shughuli za kimaendeleo na kupata viongozi bora kwa kupitia mashindano ya Halmashauri Bora mwaka 2016,”amesema Bi. Domina.

ALAT imekuwa na utaratibu wa kutoa zawadi kwa Halmashauri bora kwa mwaka wa pili sasa ambapo imesaidia Halmashauri nyingi kufanya vizuri katika ukusanyaji mapato na uboreshaji wa miundo mbinu na mazingira kwa ujumla.


 


Watumishi Wizara ya Habari watakiwa kuwa wabunifu katika utendaji kazi.


Katibu Mkuu Wizara ya Habari, Utamaduni, Sanaa na Michezo Prof. Elisante Ole Gabriel akizungumza na Watumishi wa Wizara yake wakati wa kikao kazi na watumishi wa Wizara hiyo jana katika Uwanja wa Taifa Jijini Dar es Salaam Tarehe 23 Agosti 2016.

Naibu Katibu Mkuu wa Wizara ya Habari, Utamaduni, Sanaa na Michezo Bibi. Nuru Millao akiteta jambo na Watumishi wa Wizara yake (hawapo pichani) wakati wa kikao kazi na watumishi wa Wizara hiyo jana katika Uwanja wa Taifa Jijini Dar es Salaam Tarehe 23 Agosti 2016. Kushoto ni Katibu Mkuu wa Wizara hiyo Prof. Elisante Ole Gabriel.

Mkurugenzi Msaidizi Utawala Wizara ya Habari, Utamaduni, Sanaa na Michezo Bw. Erast Mushi (kushoto) akitoa ufafanuzi wa mambo yanayohusu Idara yake kwa Watumishi wa Wizara hiyo (hawapo pichani) wakati wa kikao kazi na watumishi wa Wizara hiyo jana katika Uwanja wa Taifa Jijini Dar es Salaam Tarehe 23 Agosti 2016.  Wapili kushoto ni Katibu Mkuu Prof. Elisante Ole Gabriel, wapili kulia ni Naibu Katibu Mkuu wizara hiyo Bibi. Nuru Millao na kulia ni Mwenyekiti wa TUGHE Bibi. Magreth Mtaki.

 Kaimu Mkuu wa Kitengo cha Mawasiliano Serikalini Wizara ya Habari, Utamaduni, Sanaa na Michezo Bibi. Zawadi Msalla akijitambulisha kwa Watumishi wa Wizara hiyo (hawapo pichani) wakati wa kikao kazi na watumishi wa Wizara hiyo jana katika Uwanja wa Taifa Jijini Dar es Salaam Tarehe 23 Agosti 2016. Kulia ni Afisa Michezo Mwandamizi wa Wizara Bw. Nicolas Bulamile.
Baadhi ya Viongozi wa Wizara ya Habari, Utamaduni, Sanaa na Michezo wakimsikiliza Katibu Mkuu wa wizara hiyo Prof. Elisante Ole Gabriel ( hayupo pichani) wakati wa kikao kazi na watumishi wa Wizara hiyo jana katika Uwanja wa Taifa Jijini Dar es Salaam Tarehe 23 Agosti 2016.

Baadhi ya Watumishi wa Wizara ya Habari, Utamaduni, Sanaa na Michezo wakimsikiliza Katibu Mkuu wa wizara hiyo Prof. Elisante Ole Gabriel ( hayupo pichani) wakati wa kikao kazi na watumishi wa Wizara hiyo jana katika Uwanja wa Taifa Jijini Dar es Salaam Tarehe 23 Agosti 2016.


Picha na Shamimu Nyaki.


Na: Genofeva Matemu

Watumishi Wizara ya Habari, Utamaduni, Sanaa na Michezo wametakiwa kuwa wabunifu na kutumia mbinu mbalimbali za kiutendaji kazi ili kuweza kuifanya Wizara kujulikana na kuleta maendeleo katika jamii.

Rai hiyo imetolewa na Katibu Mkuu Wizara ya Habari, Utamaduni, Sanaa na Michezo Prof. Elisante Ole Gabriel alipokutana na wafanyakazi wa Wizara hiyo jana Jijini Dar es Salaam.

Prof. Gabriel amesema kuwa jamii itathamini kazi za Wizara ya Habari, Utamaduni, Sanaa na Michezo kama Watumishi wa Wizara watafanya jitihada za makusudi kwa kuwa wabunifu katika utendaji kazi hivvo kuleta tija na heshima kwa Serikali.

“Ni vema kila Mtumishi akajituma katika kukamilisha majukumu ya Wizara yetu kwa kasi na kwa wakati huku tukithamini maslahi ya jamii tunayoitumikia” alisema Prof. Gabriel.

Aidha Prof. Gabriel amewataka Watumishi wa Wizara hiyo kuheshimiana na kuishi kama ndugu kwani muda mwingi hutumia wakiwa ofisini na kuwahaidi kuwa kwa upande wake atahakikisha kuwa Watumishi wote wanaishi katika mazingira rafiki katika eneo la kazi.

Naye Mwenyekiti wa Chama cha Wafanyakazi (TUGHE) Wizara ya Habari, Utamaduni, Sanaa na Michezo Bibi. Magreti Mtaki amewataka watumishi wa wizara kuacha kungojea fursa zinazopatikana nje ya Wizara bali kutumia fursa zinazopatikana ndani ya Wizara kwani ni rahisi kuzisimamia na kuziendeleza kwa maendeleo ya Taifa letu.



MAGAZETINI LEO