Thursday, 28 August 2014

Marais wa Tanzania na Burundi wawatoa hofu wakazi waishio mpakani.


 Rais Jakaya Kikwete akiwasalimia wananchi wa kijiji cha Mugikomero kwa upande wa Tanzania na wananchi wa kijiji cha Nteritare kwa upande wa Burundi alipowasili  kuzindua programu ya  uimarishaji wa Mipaka kati ya Tanzania na Burundi wilayani Ngara, mkoani Kagera
Rais Jakaya Kikwete  wa Tanzania (kulia) na Rais Pierre Nkurunzinza wa Burundi (kushoto) kwa pamoja wakitazama moja ya alama ya mpaka kati ya Tanzania na Burundi  iliyokamilika kufuatia zoezi la uwekaji wa alama mpya eneo la kijiji cha Mugikomero wilayani Ngara.

Rais Jakaya Kikwete  wa Tanzania (kulia) na Rais Pierre Nkurunzinza wa Burundi (kushoto) kwa pamoja wakizindua  alama ya mpaka inayotenganisha Tanzania na Burundi eneo la kijiji cha Mugikomero wilayani Ngara.

Rais Jakaya Kikwete  wa Tanzania (kulia) na Rais Pierre Nkurunzinza wa Burundi (kushoto)  wakishikana mikono ikiwa ni ishara ya kudumisha umoja na mshikamano mara baada ya kuzindua  alama ya mpaka inayotenganisha nchi za Tanzania na Burundi.
Rais Jakaya Kikwete wa Tanzania (katikati), Rais wa Burundi Pierre Nkurunzinza (kushoto) na Waziri wa Ardhi, Nyumba na Maendeleo ya Makazi Prof. Anna Tibaijuka wakisoma maandishi yaliyopo kwenye alama ya mpaka inayotengania Tanzania na Burundi kijiji cha Mugikomero.
Rais Jakaya Kikwete akiwahutubia wakazi wa kijiji cha Mugikomero kwa upande wa Tanzania na wakazi wa kijiji cha Nteritare Burundi wakati wa zoezi la uimarishaji wa Mipaka kati ya Tanzania na Burundi wilayani Ngara, mkoani Kagera
Rais Pierre Nkurunzinza wa Burundi akiwahutubia wakazi wa kijiji cha Mugikomero kwa upande wa Tanzania na wakazi wa kijiji cha Nteritare upande wa Burundi waliofika kushuhudia  zoezi la uimarishaji wa Mipaka kati ya Tanzania na Burundi wilayani Ngara, mkoani Kagera
Rais Jakaya Kikwete wa Tanzania (katikati), Rais wa Burundi Pierre Nkurunzinza (kushoto) na Waziri wa Ardhi, Nyumba na Maendeleo ya Makazi Prof. Anna Tibaijuka wakisikiliza maelezo ya mtaalam wa upimaji na Ramani kutoka Wizara ya Ardhi (hayupo pichani) wakati wa uzinduzi wa zoezi la uimarishaji wa Mipaka kati ya Tanzania na Burundi wilayani Ngara, mkoani Kagera.
Marais wa Tanzania na Burundi wakimimina zege kwenye moja ya alama ya mpaka inayotenganisha Tanzania na Burundi kuzindua programu ya uimarishaji wa Mipaka kati ya Tanzania na Burundi wilayani Ngara, mkoani Kagera.
Viongozi wa Tanzania na Burundi wakitembelea eneo la mpaka kati ya Tanzania na Burundi katika kijiji cha Mugikomero wilayani Ngara. Kutoka kulia ni Rais Pierre Nkurunzinza wa Burundi (wa pili kushoto), Rais Jakaya Kikwete (wa tatu) na Waziri wa Ardhi, Nyumba na Maendeleo ya Makazi Prof. Anna Tibaijuka (kulia). 
Rais Jakaya Kikwete (kulia) na Rais Pierre Nkurunzinza (kushoto) wakifurahia jambo walipokutana mpakani mwa Tanzania na Burundi kuzindua programu ya uimarishaji wa Mipaka kati ya Tanzania na Burundi katika kijiji cha Mugikomero wilayani Ngara, Kagera.
Askari wa Jeshi la Burundi wakitoa heshima kwa Marais wa Tanzania na Burundi, katika kijiji cha Mugikomero mpakani mwa Tanzania na Burundi.
Rais Jakaya Kikwete (katikati) na Rais Pierre Nkurunzinza(kulia) wakipokea salam ya heshima ya jeshi na wimbo wa Taifa wakati wa uzinduzi wa programu ya uimarishaji wa Mipaka kati ya Tanzania na Burundi wilayani Ngara, mkoani Kagera.
Mkuu wa Mkoa wa Kagera Kanali Mstaafu Fabiani Masawe akizungumza na raia wa kijiji cha Nteritare, Burundi ambacho kinapakana na kijiji cha Mugikomero wilaya ya Ngara kwa upande wa Tanzania.
Kikundi cha Ngoma kutoka Burundi kikitoa Burudani wakati wa programu ya uimarishaji wa Mipaka kati ya Tanzania na Burundi katika kijiji cha Mugikomero wilayani Ngara.
Kikundi cha Ngoma cha Muyeleko kutoka kata ya Mabalo wilayani Ngara kikitoa Burudani wakati wa programu ya uimarishaji wa Mipaka kati ya Tanzania na Burundi.
Kikundi cha Ngoma kutoka Burundi kikitoa Burudani wakati wa programu ya uimarishaji wa Mipaka kati ya Tanzania na Burundi katika kijiji cha Mugikomero wilayani Ngara.
Baadhi ya wananchi wa  vijiji vya Mugikomero -Tanzania na Nteritare- Burundi wakishuhudia zoezi la uzinduzi wa programu ya uimarishaji wa Mipaka kati ya Tanzania na Burundi lilofanywa na Marais wa Tanzania na Burundi.
Jiwe la uzinduzi wa Uimarishaji wa Mpaka kati ya Tanzania na Burundi.

( Na. Aron Msigwa –MAELEZO.)

Marais wa Tanzania na Burundi wamewatoa hofu wakazi wa maeneo ya mpakani mwa Tanzania na Burundi kuwa zoezi la Uimarishaji wa mpaka wa kimataifa kati ya nchi hizo linalofanywa na wataalam wa upimaji na ramani katika maeneo ya  mipaka ya nchi hizo halilengi kuleta mgawanyiko miongoni mwao bali kuweka utaratibu mzuri wa utambuzi wa alama za mipaka ya kimataifa  na kuwawezesha wananchi wa pande zote kuwa na uhakika wa uhalali wa maeneo wanayoishi. 

Wakizungumza kwa nyakati tofauti na wananchi wa kijiji cha Mugikomero, Ngara kwa upande wa Tanzania na Nteritare kwa upande wa Burundi wakati wa uzinduzi wa zoezi uimarishaji wa mpaka kati ya Tanzania na Burundi viongozi hao wamesema kuwa Serikali za nchi zote zimeamua kufanya zoezi hilo kufuatia mabadiliko mbalimbali yaliyojitokeza katika maeneo ya mipaka  ikiwemo alama za  kwanza zilizowekwa na wakoloni mwaka 1924 kuchakaa na nyingine kung’olewa na wananchi kutokana na sababu mbalimbali, ongezeko la watu, shughuli za kiuchumi na baadhi ya maeneo ya mito iliyokuwa ikitenganisha nchi hizo kukauka. 

 Rais wa Tanzania Mh. Dkt. Jakaya Kikwete akizungumza na wananchi wa vijiji hivyo amesema kuwa zoezi hilo linatokana na agizo la Umoja wa Nchi za Afrika (AU) lililotolewa mwezi Juni 2007 wakati wa kikao cha wakuu wa nchini  na serikali  kilichofanyika Accra, Ghana ambacho kilizitaka nchi zote za Afrika kuwa zimehuisha upya mipaka  ifikapo mwaka 2017 ili kuondoa migogoro inayojitokeza.

Amesema baadhi ya nchi za Afrika zimekuwa katika malumbano na machafuko ya mipaka kutokana na kutokuwa makini katika kuhakiki maeneo ya mipaka na kuongeza kuwa Serikali ya Tanzania itahakikisha kuwa zoezi hilo linaendeshwa kwa ufanisi mkubwa katika maeneo mengine yaliyobaki.

“ Sisi na Burundi ni ndugu wa damu tumechagua njia ya mazungumzo na kalamu, Marafiki huchora mipaka kwa mazungumzo na kalamu, maadui huchora mipaka kwa nguvu na kwa wino wa damu, mipaka ya kalamu hudumu na hustawisha jamii wakati ile ya damu huleta chuki, hujuma ,dhuluma na kisasi” Amesisitiza.

Amesema kuwa serikali ya Tanzania kwa kushirikiana na Serikali ya Burundi itahakikisha kuwa eneo lote la mpaka kati ya Tanzania na Burundi lenye urefu wa kilometa 450 katika mikoa ya Kagera na Kigoma linafikiwa licha ya kuwepo kwa changamoto mbalimbali na gharama kubwa za kufanikisha zoezi hilo.

“Maeneo mengi yako msituni, yako kwenye mabonde, mito na ni vigumu kuyafikia,tumeamua kuyagharamia na kufanya wenyewe kwa fedha zetu wenyewe kuonyesha dhamira na utashi wetu kulikamilisha zoezi hilo kabla ya muda uliowekwa ili kuondoa sintofahamu iliyokuwepo” Amesisitiza.

Amesema kuwa serikali itahakikisha kuwa inatenga fedha za kutosha kukamilisha  zoezi la uwekaji wa alama za mipaka  ili kuwezesha serikali za nchi mbili kuwa na mkataba mpya ambao utafuta mkataba uliowekwa na wakoloni.
Amewataka wakazi wa maeneo hayo kuwa walinzi wa alama za mipaka na kuepuka kuhujumu zoezi hilo, kulima katika maeneo ya hifadhi kutokana na umuhimu wa alama hizo kimataifa na kwa wakazi wa maeneo husika kwa kuwa zoezi hilo baada ya kukamilika litaondoa mashaka kuhusu uhalali wa maeneo wanayoyamiliki, huduma, shughuli za biashara na ujenzi wa makazi.

Kwa upande wake Rais wa Burundi Mh. Pierre Nakurunzinza ameishukuru Serikali ya Tanzania kwa kuendelea kushirikiana na serikali ya Burundi katika kutekeleza majukumu na masuala mbalimbali yenye manufaa kwa wananchi.

Amesema ushirikiano katika zoezi hilo unaonyesha wazi kuwa Serikali za nchi zote mbili zinafanya kazi kwa ushirikiano mkubwa na kuongeza kuwa kuanza kwa zoezi hilo ni uthibitisho tosha kuwa waafrika wanaweza kufanya mambo yao wenyewe kwa ufanisi mkubwa.

Amefafanua kuwa Tanzania imefanya mambo mengi sana kwa serikali ya Burundi na hilo linathibitisha dhamira safi na ushirikiano mkubwa tokea wakati wa machafuko na vita iliyotokea nchini Burundi.

“Serikali ya Tanzania imekuwa bega kwa bega na serikali yetu ya burundi,Tanzania imefanya mambo mengi sana kwa wananchi wa Burundi, iliwahifadhi wananchi wa Burundi wakati wa machafuko,iliwalisha iliwatunza na kuwathamini na zoezi tunalolifanya sasa la kuhakiki mipaka ni dogo sana ikilinganishwa na undugu na umoja wetu” Amesisitiza.

Amewataka wakazi wa pande zote mbili kuhakikisha kuwa wanatoa ushirikiano kwa wataalamu wa upimaji na ramani wa nchi zote mbili na kuongeza kuwa wananchi wote watakaoathiriwa na zoezi hilo kutokana na kupoteza maeneo yao watalipwa fidia na kutafutiwa maeneo mengine.

Kwa upande wao mawaziri wa Ardhi,Nyumba na Makazi wa nchi hizo Prof. Anna Tibaijuka wa Tanzania na Jean Claude Nduwayo wa Burundi wameeleza kuwa zoezi la uhakiki wa mpaka  wenye urefu wa kilometa 450 na alama 58 zilizoanzia Pwani ya Mashariki ya Ziwa Tanganyika hadi Kusini mashariki mwa mto Mwibu lina manufaa makubwa kwa wananchi wan chi zote mbili.

Wamesema Tanzania na Burundi zimefanya kazi kwa ushirikiano kupitia kamati ya Pamoja ya Ufundi ya Mipaka ya Kimataifa (JTC) amabayo ilitoa maamuzi muhimu ya ufanikishaji wa zoezi hilo ikiwemo uamuzi wa upana wa eneo la wazi la mpakani (buffer zone) kuwa mita 12.5 kila upande wa mpaka, Kuanza kwa kazi ya uimarishaji wa mpaka mwezi Machi mwaka huu pamoja na uratibu wa shughuli ya uzinduzi wa shughuli ya uimarishaji wa mipaka.

Wamefafanua kuwa uamuzi wa kuimarisha mpaka umetokana na kuwepo kwa ongezeko kubwa la shughuli za kiuchumi katika maeneo ya mpakani, hali ya mabonde na milima iliyopo ya mabonde na milima katika sehemu kubwa ya mipaka inayofanya utambuzi wa mpaka kuwa mgumu kwa wananchi wa kawaida.




Matukio katika picha leo Bunge Maalum la Katiba mjini Dodoma.


Waziri wa Habari, Vijana, Utamaduni na Michezo, Mhe. Fenella Mukangara (kulia) ambaye pia ni mmoja wa Wajumbe wa Bunge Maalum la Katiba akibadilishana mawazo na mjumbe mwenzie leo 28 Agosti, 2014 katika eneo la Bunge mjini Dodoma.


Baadhi ya Wajumbe wa Kamati mbalimbali za Bunge Maalum la Katiba wakitoka ndani ya Bunge leo 28 Agosti, 2014 mjini Dodoma.

(Picha zote na Benedict Liwenga)

Waziri wa Nchi,Ofisi ya Makamu wa Rais Dkt Bilinith Mahenge atoa wito kwa wananchi

Waziri wa  Nchi , Ofisi ya Makamu wa Rais Mazingira Dkt  Binilith akizunguza na waandishi wa habari  leo jijini Dar es Salaam kuhusu mkutano  wa Mawaziri wa Mazingira na Mambo ya nje kutoka nchi za kamati ya wakuu wa Nchi za Afrika unatarajiwa kufanyika Agosti 29, 2014 nchini.



Mkurugenzi  Msaidizi wa   Idara ya Mazingira  Suzi Salula akifafanua jambo kwa waandishi wa habari  kuhusu mabadiliko ya tabianchi leo jijini Dar es Salaam ambapo Tanzania inatarajiwa kuwa mwenyeji wa mkutano  wa Mawaziri wa Mazingira na Mambo ya nje kutoka nchi za kamati ya wakuu wa Nchi za Afrika unatarajiwa kufanyika Agosti 29, 2014 nchini.

Na Lorietha Laurence.
Waziri wa  Nchi , Ofisi ya Makamu wa Rais Mazingira Dkt.  Binilith Mahenge ametoa wito kwa wananchi kuunga mkono juhudi za serikali na za Bara la Afrika  kupambana na changamoto za mabadiliko ya tabianchi ili kupata maendeleo endelevu.
Hayo yalisemwa jijini Dar es Salaam alipokuwa akizungumza na waandishi wa habari kuhusu mkutano wa Mawaziri wa Mazingira na Mambo ya nje kutoka nchi za kamati ya wakuu wa Nchi za Afrika unatarajiwa kufanyika Agosti 29, 2014.
Mkutano huu wenye lengo la kujadili na kupendekeza masuala muhimu  ya bara la Afrika  kuhusu upatikanaji wa fedha na teknolojia katika kukachangamoto hizo zinazo athiri sekta ya kilimo, usafirishaji, afya, nishati,mifugo,uvuvi,viwanda na maji.
“ni jukumu letu sote kuhakikisha tunakabiliana na mabadiliko ya tabia ya nchi kwa kutumia gesi na majiko maalum ili kupunguza gesijoto inayopelekea mabadiliko ya tabia ya nchi” alisema Dkt. Mahenge
Aidha aliongeza kuwa  mkutano huo  ni maandalizi ya mkutano unaotarajiwa kufanyika Septembe  23, 2014 ulioitishwa na Katibu Mkuu wa Umoja wa Mataifa na ule wa 20 wa Nchi wananchama wa Mkataba wa Mabadiliko ya Tabianchi utakaofanyika Mjini Lima, nchini Peru  Desemba 1-12,2014.
Naye Mkurugenzi Msaidizi wa   Idara ya Mazingira Suzi Salula aliongezea kuwa juhudi za kukabiliana na mabadiliko ya tabianchi zinahitajika kutiliwa mkazo ili kuweza kujikwamua kuondokana na changamoto hii.
Ripoti ya Wataalamu wa Kimataifa  kuhusu mabadiliko ya tabianchi inaonyesha  kuwa mwaka 2013 joto la dunia limeongezeka kwa nyuzi joto 0.85 juu ya wastani wa joto la dunia na kupelekea ongezeko la gesijoto   na kuathiri  kwa kiasi kikubwa sekta ya Kilimo, nishati, afya, usafirishaji, mifugo, uvuvi, viwanda na maji.
 

 


Mwenyekiti wa Bunge Maalum la Katiba, Mhe. Samuel Sitta avitaka Vyombo vya Habari kuandika habari bila kupotosha Umma.

Mwenyekiti wa Bunge Maalum la Katiba, Mhe. Samuel Sitta akiongea na waandishi wa Habari huku akiwaasa kuacha chuki katika masuala yanayohusu mchakato wa Katiba.

Baadhi ya waandishi wa Habari wakifuatilia maelezo yakiyotolewa na Mwenyekiti wa Bunge Maalum la Katiba, Mhe. Samuel Sitta (hayupo pichani) leo 28 Agosti, 2014.

Mjumbe wa Kamati Namba Nne ya Bunge Maalum la Katiba, Mhe. Christopher  Ole Sendeka akiongea na wandishi wa Habari kuhusu kazi na majukumu ya Kamati yake leo 28 Agosti, 2014.

Mjumbe wa Kamati Namba Tatu ya Bunge Maalum la Katiba, Mhe. Dkt. Francis Michael akifanya mahojiano na wandishi wa Habari kuhusu kazi na majukumu ya Kamati yake leo 28 Agosti, 2014.

Mjumbe wa Kamati Namba Moja ya Bunge Maalum la Katiba, Mhe. Ummy Mwalimu Ally akiongea na wandishi wa Habari kuhusu kazi na majukumu ya Kamati yake leo 28 Agosti, 2014.

Mjumbe wa Kamati Namba Kumi na Moja, Mhe. Hamad Massauni akifanya mahojiano na wandishi wa Habari kuhusu kazi na majukumu ya Kamati yake leo 28 Agosti, 2014.

(Picha zote na Benedict Liwenga, Dodoma)



Na Benedict Liwenga, Maelezo-Dodoma.

MWENYEKITI wa Bunge Maalum la Katiba, Mhe. Samuel Sitta amevitaka vyombo vya habari nchini kuacha uchochezi na chuki wakati vinapohabarisha umma kuhusiana na mchakato wa Katiba Mpya.

Kauli hiyo nimetolewa leo na Mhe. Sitta wakati alipokutana na baadhi ya waandishi wa habari katika viwanja vya Bunge mjini Dodoma huku akiviasa vyombo vya habari kuachana na kuandika habari zenye kuleta uchochezi na  chuki ili kuvuruga mchakato wa Katiba Mpya.

Mhe. Sitta amesema kuwa kuna baadhi ya watu wamekuwa na dhana tofauti kuhusu kazi ifanywayo na  Bunge Maalum la Katiba, hivyo ni vema kuepukana nao na kuhabarisha umma taarifa sahihi ili Katiba Mpya iweze kupatikana.

”Kusema tunafanya kazi ya Tume ni upotoshaji mkubwa, sisi tunafanya kazi tuliyotumwa tena kwa uadilifu mkubwa.upotoshwaji mwingine  unafanywa na baadhi ya watu ambao hawalitakii mema Taifa letu na hawapendi kuona mchakato wa Bunge la Katiba unaendelea vizuri,” alisema Mhe. Sitta.

Mhe. Sitta ameongeza kwa kutolea ufafanuzi juu ya baadhi ya makundi yaliyowasilisha mapendekezo yao katika Bunge hilo, kwa kusema kuwa maoni yanayoletwa na makundi mbalimbali kwa lengo la kuboresha Rasimu Mpya ya Katiba yanapokelewa lakini sio maoni tu ya mtu binafsi au mwananchi, bali wanapokea maoni kupitia makundi maalum kama yalivyo kwa wafugaji, Wasanii na Wakulima ambao wameshawahi kuwasilisha maoni na mapendekezo yao  katika iliyokuwa Tume ya Mabadiliko ya Katiba lakini hayakuonekana na mengine yalisahaulika  katika Rasimu hiyo. 

“Tuna haki na wajibu wa kuyapokea makundi haya ili kutoa Katiba iliyo rafiki kwa wananchi wote,” alisisitiza Mhe. Sitta.

Wakati huohuo, baadhi ya Wenyeviti wa Kamati mbalimbali za Bunge hilo, wamesema wamemaliza kazi ya kuchambua Rasimu hiyo vizuri katika Kamati zao.

Akizungumzia kuhusu kazi hiyo, Mwenyekiti wa Kamati Namba Tatu ya Bunge hilo, Dkt. Francis Michael amesema suala  la ardhi lilionekana kuwa nyeti katika Kamati yake.

 Dkt. Francis aliongeza  kuwa suala la kupokea mapendekezo kutoka kwa makundi mbalimbali si kwamba kila kitu kitawekwa kwenye  Katiba Mpya bali  ni yale mambo ya msingi.

Naye Mwenyekiti wa Kamati Namba Moja ya Bunge hilo, Mhe. Ummy  Mwalimu Ally na Makamu Mwenyekiti wa Kamati Namba Kumi na Moja, Mhe. Hamad Massauni walisema kuwa katika Kamati zao majadiliano yalikwenda vizuri.